5 ماۋسىمنان باستاپ ارنايى ءۇش مونيتورينگتىك توپ الاكولدىڭ شىعىس جاعالاۋىندا ورنالاسقان تۋريستىك نىسانداردىڭ كوروناۆيرۋس جاعدايىنداعى جازعى ماۋسىمعا دايىندىعىن تەكسەرۋدە.
دەمالىس ورىندارىنىڭ باسشىلارى شقو اكىمى دانيال احمەتوۆتى قولداپ، مونيتورينگتىك توپپەن بىرگە سانيتارلىق-ەپيدەميولوگيالىق تالاپتاردىڭ قاتاڭ ساقتالۋىن تەكسەرۋگە كىرىستى.
– وبلىس اكىمى دانيال احمەتوۆپەن كەزدەسۋ ءوتتى. كەزدەسۋ بارىسىندا ايماق باسشىسى بىزگە دەمالىس ورىندارىن تولتىرۋدىڭ جاڭا جولىن ايتتى. سونداي-اق مونيتورينگتىك توپپەن بىرگە جۇمىس ىستەۋدى ۇسىندى. ەندى ءبىز توپ مۇشەلەرىمەن بىرگە دەمالىس ورىندارىنىڭ قوناقتاردى قارسى الۋعا قانشالىقتى دايىن ەكەنىن تەكسەرىپ جاتىرمىز. ويتكەنى دەمالۋشىلار مەن قىزمەتكەرلەردىڭ دەنساۋلىعى ءبىز ءۇشىن ءبىرىنشى ورىندا، – دەدى «ءىنجۋ» جانە «الاكول اراسان» دەمالىس ورىندارىنىڭ يەسى انار باتىموۆا.
رەيدتىڭ قورتىندىسى بويىنشا، 60 دەمالىس ورنى ءىشىنارا دايىن ەكەنى انىقتالدى. ءقازىر وسى 60 دەمالىس ورنىندا سانيتارلىق-ەپيدەميولوگيالىق نورمالاردى ساقتاۋ جۇمىستارى جۇرگىزىلۋدە. 14 دەمالىس ورنىنا دايىن دەگەن اكتى بەرىلدى. اتالمىش دەمالىس ورىندارىندا كەلۋشىلەردىڭ 50 پايىزى (712 ادام) ورنالاسا الادى. 101 دەمالىس ورنى دايىندىقتى ازىرشە باستاعان جوق. سەبەبى بۇل دەمالىس ورىندارىنىڭ دەنى 2-3 جاعالاۋلاردا ورنالاسقان. سايكەسىنشە، ولار 20 ماۋسىمعا تامان اشىلادى.
– ءبىز بارلىق سانيتارلىق-ەپيدەميولوگيالىق تالاپتاردى ورىنداپ، رەسمي تۇردە جۇمىس ىستەۋگە رۇقسات الدىق. ءاربىر شىعابەرىس ەسىكتە سانيتايزەرلەر قويىلىپ، الەۋمەتتىك قاشىقتىق ساقتالعان. قورعانىس قۇرالدارى دا بار. بىزدە 100 پايىز ءقاۋىپسىز دەپ ايتا الامىز. قازاقستاندىقتارعا ءوتىنىشىم بار، جەدەل تەستتەن وتكەنىڭىز تۋرالى انىقتامانى ۇمىتپاي الا كەلۋلەرىڭىزدى سۇرايمىز، – دەدى «پارۋس» دەمالىس ورنىنىڭ يەسى جاننا رامازان.
كاسىپكەرلەر الاكول جاعالاۋىنداعى قاۋىپسىزدىكتى قامتاماسىز ەتۋ ماڭىزدى ەكەنىن تۇسىنەدى. ولار وسى باعىتتاعى اتقارىلاتىن جۇمىستارعا ۇلكەن جاۋاپكەرشىلىكپەن قارايدى.
– دەمالىس ورنىن اشپاستان بۇرىن ارنايى دەزينفەكسيالىق قۇرالدار، دەزينفەكسيالىق كىلەمدەر، قولعا ارنالعان انتيسەپتيكتەر، ماسكالار مەن باس كيىمدەر الىندى. سونىمەن قاتار دەمالۋشىلار قاۋىپسىزدىك شارالارىن ءبىلسىن دەپ جادنامالار شىعاردىق. ءبىزدىڭ باستى مىندەت – ادامداردىڭ دەنساۋلىعىن ساقتاۋ. ءبىز ءۇشىن ادامداردىڭ ەمىن-ەركىن دەمالۋى ماڭىزدى. الاكولگە كەلۋ ءۇشىن COVID-19 تەستىنەن وتكەنى تۋرالى انىقتامانى الا كەلۋ كەرەك. بىزدە مۇندا وتباسىمىزبەن كەلۋ ءۇشىن تەست تاپسىردىق، – دەدى «راسسۆەت» دەمالىس ورنىنىڭ اكىمشىسى تاتيانا كالۋگينا.
شقو اقپارات ورتالىعى
پىكىر قالدىرۋ